عندك طعميه بايته مترميهاش.. وتعالى اقولك تعملى بيها ايه

جوزى الله يسامحه لو لقانى طابخه صنف مش على مزاجه بيعمل ايه.......؟؟؟؟
بيبعت يشترى فول وطعميه بكميات وبمجرد ماياكل قرص او اتنين طعميه يزهق ويرميها فى التلاجه ، وانا بجرب اكلها انا ولابنتى نلقاها غرقانه فى الزيت نقرف ناكلها ..طب هنرميها بقى ولا نتصرف ازاى وتبات فى التلاجه على كده
فكرت فى فكيره حلوه .. اختراع ..وده تانى اختراع للطعميه
جبت مناديل ورقيه بدون ريحه وعصرت الطعميه كويس من الزيت وبعدين فرمتها بالمبشره
وبعدين قطعت فوقها مايشبه السلطه البلدى (بصل مفروم وطماطم مفرومه وتوابل وشوية صلصة طماطم بالشطه كانوا فايضين من الكشرى) وكسرت فوق كل دول بيضتين وخلطت الجميع جيدا
دهنت طاسه بقليل جدا من الزيت وحطيتها فى الميكرويف
خرجتلى اجمل عجة طعميه وبدل ماكنا هنرميها خطفناها من بعض
عملناها وليمه وقسمناها على بعض وقضينا الليله والحمد لله ايه رأيكوا بقى عرفت اتصرف ولا ايه؟؟؟
لوعجبتكم الطريقه..قيموا الموضوع ..والاجر والثواب على الله
منقول للفائدة